مسمن بدقيق القمح جد رائع
مسمن بدقيق القمح كيجي جد رائع جاراتي ولذيذ وكيدوب
فالفم وطريقة التحضير ديالو جد سهلة الا تبعتي الخطوات
وان شاء الله ينجح ليك ويحمر ليك وجهك قدام ناسك بالنسبة
لهاد المقادير كيخرجو ليها 12 مسمنة
نتوكلو على الله
المقادير:
650 غرام دقيق القمح اولا سميدة رقيقة
معلقة صغيرة ونصف ديال الملح
3 معالق كبار حليب غبرة
نصف معلقة صغيرة خميرة الحلوة
معلقة صغيرة خل
نصف معلقة صغيرة خميرة الخبز حبوب
440 غرام ماء دافئ
40 غرام طحيم فورص
70 غرام زبدة
70 غرام زيت الزيتون
كيس خميرة الحلوة
طريقة تحضير مسمن بدقيق القمح :
فقصرية كنديرو دقيق القمح اولا السميدة
نصف معلقة صغيرة خميرة الملح والحليب غبرة
والخل وفالاخير خميرة الخبز نخلطوهم وناخدو نصف
كمية الماء نضيفوها على المكونات ديالنا
وحنا كنعجنو مزيان حتى العجينة تشرب داك
الما ومن بعد نزيدو النصف الثاني ديال الما
وحنى كنعجنو غادي تخرج لينا عجينة
رطبة وجارية لي منقدروش نجمعوها
وندلكوها شي شوية باش القمح ديالنا يشرب
داك الما ومن بعد نخليوها ترتاح لمدة مابين 3 و5 دقايق
القمح اولا السميدة ماشي كلهم بحال بحال
بالنسبة لامتصاص الماء يعني ممكن تكون
3 دقايق كافية وممكن نحتاجو اكثر
ومن بعد ناخدوها ونرجعوها للقصرية
ديالنا وناخدو نصف كمية الطحين
ونعجنوها مزيان حتى مايبقاش
الاثر ديال طحين
وعاد من بعد نجيبو النصف الثاني
ونديرو نفس العملية من بعد غاديا تولي العجينة
ساهلة نخدمو عليها وفالاخير غتكون عندنا عجينة
ملسة وكتجمع وليني كتلصق
فحالة الا كانت العجينة دياكم قاصحة تزيدو ليها
شوية الما ويلي كانت باقا جارية نزيدو ليها
شوية الطحين ومن بعد نجيبو كيس بلاستيكي غذائي
وعلبة كبيرة نسخنو الما مزيان حتى يغلى ونكوبوه
فالقاع ديال العلبة اولا الوعاء ومن بعد نحوطو شي
اناء الوسط لي يكون عالى على المستوى ديال
الما ونديرو العجينة فالكيس البلاستيكي
ونحطوها فوق الاناء لي وسط العلبة
ومن بعد نغطيوها بغلاقة
فحالة مكانتش عندك ممكن ديري بلاستيك غذائي
تغطي بيه والفوق ديالي ديري صينية اولا طبسيل باش
نخليو العلبة مخافطة على الحرارة لي فيها ونخليو العجينة
ترتاح لمدة مابين 40 دقيقة تال ساعة ندوزو لمرحلة الثانية
ناخدو الزبدة ونوبوها غير دوب نزيدو عيهازيت الزيتون ممكن
تستعلمي زيت المائدة ولكن كنفضل زيت الزيتون لانه كيضيف
مذاق رائع للمسمن ديالنا ومن بعد كيس خميرة كيميائية
ونخلطو هادشي مزيان وناخدو زلافة فيها زيت بوحدو باش ندهنو
بيه ايدينا ونشكلو الكويرات ونكرصو بيه العجينة ونطيبو بيه
الخليط ديال الخميرة غنحتاجوه للتوراق هو وزلافة فيها القمح
من بعد ندهنو ايدينا بالزيت
ونجبدو العجينة من البلاستيك
ونديرو بيها كويرات ونحطوهم فوق صينية
مدهونة مزيان بالزيت
وايضا حتى الكويرات ندهنوهم
مزيان بالزيت
وملي نكملو الكمية كاملة ديال العجينة
نغطيوها ببلاستيك غذائي
ونبداو ناخدو بالوحدة بالوحدة ونكرصوها بزيت
الزيتون لانه هو لي غادي يسهل عملية التوراق
وميخليش العجينة تقطع
وملي تولي رقيقة نجيبو الخليط ديال الخميرة
والزيت والزبدة وندهنو بيه العجينة ونرشو
القمح ونديرو الطية الاولى
وندهنو مرة خرا بالخليط لي عندنا
ونديرو الطوية الثانية
ونبقاو بحال هاكا حتى نطويو
المسمنة ديالنا كاملة
فكل طوية ندهنو بالخليط ونرشو القمح نوجدو شي
2 اولا 3 ونسخنو مقلة تكون ثقيلة حتى تسخن مزيان ونرشوها
بالزيت ونبداو نطيبو ونبقاو نقلبو فيها حتى تشد اللون والحليب
غيرة لي درنا فيه غيخليهم ياخدو لون رائع وبزربة وفنفس الوقت
كنصايبو كرصات جدادات والمكان لي كنحطوه فوقهم يكون
مدهون مزيان بالزيت ومنخليوهمش مدة طويلة باش مترخاش
العجينة وملي تبدا طيب الكرصة ديالنا نقصو العافية شوية
وكل مرة فيلما نبغيو نقلبوها نرشو الزيت ونقدمو
مسمن بدقيق القمح بالصحة والراحة
كنتمنى تجربوه ويعجبكم ونالو نصيب